ميرا : لؤي شتقتلك ، شتقت لنسهر سوى وننسا كلشي مليت من الكآبة

لؤي : تعي ياعمري تعي نسهر ع البلكون روحي عدي و ارتاحي و انا رح اعملك فنجان قهوة ومنقضي سهرة غير شكل

ميرا : ماشي حياتي ناطرتك

لؤي عمل قهوة و اجا لعندي شربنا وحكينا وضحكنا يمكن هي اول مررة من اسبوعين بحس دقات قلبي رجعتلي ..
انا الحب يلي بحبو ياه للؤي بعمرو ماحدا حبو لحدا ، يمكن يلي مصبرني ع مصايبي هو وقفة لؤي معي وحبي الو ، كل ما بطلع بعيونو بحس روحي رجعتلي ..

لؤي : دبدوبتي انا نعست قومي ننام

ميرا : و انا نعست كتير والله

لؤي : بكرى فيقيني بكير

نمنا وتاني يوم الصبح فقت بكير حطيت فطور وفيقت لؤي اكلنا وهو راح ع شغلو و انا اعدت كمل شغل البيت ..
لحد ما اندئ باب المزرعة الرئيسي
اتطلعت من الكاميرا كان معتصم ..
فتحتلو الباب ونزلت لعندو
ميرا : اهلين معتصم تفضل
معتصم : يزيد فضلك
ميرا : تعا نئعد جنب المسبح الجو حلو
معتصم : طيب

اعدنا وضلبنا ساكتين للحظات ..
معتصم : صار شي جديد
ميرا : لاء من مبارح بالليل لليوم ماصار ولاشي وكتير مبسوطة لانو سهرنا انا ولؤي و ضحكنا وروقنا والحمدلله ماصار شي غريب ..

معتصم : كتير منيح
ميرا : في شي ؟
معتصم : ديري بالك من لؤي
ميرا : لؤي ؟ ههههه لؤي جوزي كيف بدي دير بال.. مافهمت شو قصدك
معتصم : لؤي هو ورى كل هالشي يلي عم بصير معك
( دمعو عيوني ) : شو يعني لؤي ؟! لؤي بدو ياني جن
معتصم : اي لؤي
( صرت ابكي ) ميرا : طيب ليش شو هدفو ؟
معتصم : مابعرف بدو يطالعك مجنونة يمكن ، ميرا اتطلقي منو ورجعي لبيت اهلك هاد واحد حشرة مابيستاهل ضفرك
ميرا : قلي انك عم تمزح مشان الله ، لك لؤي مابيعمل هيك انا حبيبتو مابيعمل هيك
معتصم : ماعم بمزح هي حقيقة لؤي
ميرا : انت من وين عرفت
معتصم : هو الوحيد يلي معو مفتاح البيت ويقدر يفوت ويطلع ايمتا مابدو ، هو الوحيد يلي بيعرف عنك كلشي وهو يلي حكا الي وللشباب
ميرا : لا ماعم سدئ يارب
معتصم : انا هلئ بدي امشي لاتقولي لحدى يلي حكيتلك ياه بتمنى رفقاتي مايعرفو انو انا يلي وصلتلك ..

معتصم اعد عندي عشر دقايق وراح ماكنت بعرف انو هالعشر دقايق يلي اعدن عندي بيساوو تعاسة عمر بحالو
بعد مامشي ، حسيت حالي انهديت صرت ابكي و اسند حالي ع الحيطان لاقدرت اطلع ع البيت ..
اعدت ع الارض و انا عم اخبط بإيديي ع البلاط و ابكي بصوت عالي ..
اخر شي ماعد شفت بعيوني غبت عن الوعي مابعرف اديش ، بس لما صحيت لقيت حالي ع ايدين لؤي ع التخت

لؤي : فقتي و اخيرا ياقلبي
ميرا : بعد عني
لؤي : شبك
ميرا : بعد الحب يلي حبيتك ياه و الثقة يلي وثقتا فيك هيك بتعمل فيني
لؤي : رح تفهميني شو عم تخبصي ولا شوو
ميرا : عأساس مانك فهمان شو اصدي .. خلص لؤي لاتزيد ولاتعيد ، طلقني

لؤي : انتي فعلا مجنونة انتي مجنونة ومريضة لك شو طلقني شو عم تخبصي

لؤي طلع اعد بالصالون و انا ماكنت طايقة اتطلع فيه ، بلشت ضب غراضي بدون ماينتبه ، كنت ناوية اهرب من البيت بس ينام هو .. اتصل بمعتصم وخبرتو شو قررت لانو مافي غيرو بساعدني
بعد شوي سمعت صوت حدا عم يركد ع اسطوح الغرفة
بس خلص ماعد اهتميت لشي قضيت الوقت كلو و انا اعدة وعم ابكي تزكرت الليلة يلي هربت فيها من بيت اهلي .. وقتا لملمت غراضي بنص الليل وطلعت كان لؤي ناطرني بآخر الشارع .. حملني وحطني بالسيارة وجينا ع هي المزرعة كان مزينلي ياها بالورد و البولين ...
تزكرت كيف ضحيت كرمالو وهو هلئ عم يموتني ع البطيئ ..

مضي الوقت وصارت الساعة 12 بالليل ماعد في ولا صوت بالصالون شكلو لؤي نام .. طلعت و انا حاملة بإيدي شنتاية صغيرةة، لقيتو متسطح ع الكنباية وغفلان .. قربت عليه بستو من خدو و همست : بحبك بس انت مو اد هالكلمة

فتحت باب البيت وطلعت وتركت ذكرياتي وتركت قلبي جوا هالبيت .. طلعت من المزرعة كلا و انا عم افتح الباب الرئيسي شفت ضو سيارة قوي جاية من بعيد بعدين وقفت السيارة جنبي ونزل منا شب .. لما صار يقرب مني هالشب وقتا عرفت انو هاد احمد رفيق لؤي ..
ميرا : انت شو جابك
احمد : انتي وين رايحة
ميرا : شو الك علاقة ، قلي شو جابك لؤي بالبيت روح لعندو ، انت وهو اوسخ من بعض
احمد : ازا ماطلعتي معي مابتعرفي شو رح يصير
ميرا : لاتخليني صرخ لم عليك الدنيا
احمد : ياغبية طلعي ع البيت

مسكني من ايدي وشحطني ع البيت ..
طلعنا ع الدرج بعدين دق الباب ع لؤي : لؤي فتاح انا احمد
لما فتح الباب ولقاني مع احمد تفاجئ قلي : شووعم تعملي برات البيت انتي
احمد : لاتفهم الموضوع غلط خلينا نفوت ورح فهمك كلشي
ميرا : انتو كلكن اوسخ من بعض ، مين انت لتقلي ياغبية
لؤي : عنجد هالحكي احمد ؟ انت هيك قلتلا لميرا
( وهجم بدو يقتلو )
احمد : اي بس فهام ليش هيك قلتلا ( وبعد لؤي عنو )
لؤي : شووو احكي

احمد : كلشي صار مع ميرا بسبب معتصم
ميرا : كذبة جديدة ؟ لانو معتصم احسن منكن ياكزابين
لؤي : ميرا سكتي ، شو يعني ؟

احمد : معتصم من اول ماشاف ميرا طار عقلو فيا وعجبتو
ماعرف كيف ياخدا منك صار يحاول يعمل هي الشغلات مع ميرا ليخوفا ويوهما انو هاد انت يلي عم تلعب فيا مشان تكرهك وتطلب الطلاق و اغلب الشغلات كان يعملا وقت تكون انت برات البيت ليهلي ميرا تشك فيك الك ، وقت كنا نجي لعندك ع البيت طبع نسخة من مفاتيحك و صار يفوت ويطلع ع البيت ايمتا مابدو و وقت انت سافرت لقاها من الله ليتقرب من ميرا من ناحية انووهو منيح وواقف معا ويجذبا الو ومن ناحية تانية انو مايخليا تشك فيه وتتأكدوانو هاد انت ، هو يلي قام شرطان الكاميرات وبدلن بشرطان جديدة مشان انت تفكر ميرا جنت وتكرها وهي مشان تفكرك عم تلعب عليها ..
وبيت ام سعد هو كان يعرفون من زمان وهو يلي حكالن قصة ميرا ووحدتا وبعدا عن اهلا كرمال يتقربو منا و يعملولا رعب بحياتا وهو اصدا حكالك عن خلود وبعدين تحجج اني بالمشفى وهو كزاب انا كنت متصل فيه بدي شوفو قام حكا معي بصفة اني ممرض ، كان بدو ياكي تروحي لعند خلود لانو حفيدتا مرتو مشان تسدئي انو هو متجوز وماتشكي فيه بس هو ماكان بدو ياها لمرتو لانو مابتجيب ولاد ، وهيب كانت عينو بميرا وهو فعلا اجا لعندا ع البيت وكان بدو يعتدي عليها بس هي ماسمحتلو و العتو ..
كلشي كان يصير بتخطيط معتصم ..
ووانا بدي ياكن تسامحوني لاني ساعدتو ببعض الشغلات بس هلئ حسيت بغلطي لانو حرام يلي عم بصير
ميرا : لا ماعم سدق يلي عم بسمعو لا مستحيل تنلعب عليي هيك لعبة ؟ اناا

لؤي : انا كنت مفكركن اخواتي هيك بتطعنوا بضهري ؟

احمد : ماكان بدي ياكي تطلعي من البيت لانو معتصم بيعرف انك طالعة من البيت وهو لاطيلك بطريق فاضي كان ناوي يخطفك ، خبرني بكلشي بس انا ماهان عليي و اجيت احكيلك

ميرا : الله يلعنكن ..

اعدت بالارض و انا عم اتطلع حوليي لسا لهلئ مو فاهمة شي ، فوتوني بمرض نفسي من ورى النقص يلي عندن ..

لؤي : ميرا امشي معي ، احمد خدنا ع اقرب مكان رح يكون فيه معتصم عم يستنا ميرا

طلعنا كلياتنا بسيارة احمد بعد ما اتفقنا طبعا شو رح نعمل .. وصلنا ع المنطقة يلي فيها معتصم ، لؤي و احمد صفو السيارة بٱخر الطريق و انا نزلت وصرت امشي بالطريق الفاضي
بالآخير وصلت للمكان يلي كان فيه معتصم فعلا لقيتو واقف هنيك ومعو سيارة ..
عملت حالي مو شايفتو لانو هو كان اعد بالسيارة وكملت الطريق ، بعد شوي بلاقيه نزل من السيارة وركد ورايي شدني من ايدي ..
معتصم : ميرا تعي
ميرا : هاد انت معتصم ، شو عم تعمل هون
معتصم : عم بستناكي لنعيش سوا رح اخدك من لؤي الكزاب وعيشك بسدئي و اماني انا ، شو كنت مستني هاللحظة
حط ايد ع رقبتي و الايد التانية ع تمي وشحطني ع السيارة
خلال ثواني كانت سيارات الشرطة يلي اتصلنا فيهن ليعملو لمعتصم كمين ويلقطوه بالجرم المشهود محاوطة المكان ، نزلوني من السيارة ورحت لعند لؤي و احمد وقفت جنبهن ..
ومعتصم شحطوه الشرطة بالسيارة ، نحنا طلعنا وراهن ع المخفر بسيارة احمد ..

بالمخفر دخلت انا و احمد و معتصم ولؤي ع الغرفة كان الضابط بدو ياخد افادتنا ..
الضابط : بنتي بدك تدعي عليه ليلي حاول خطفك ؟
ميرا : اي اكيد ، لانو بسببو كان رح ينخرب بيتي
الضابط : طيب ، فيكي تطلعي لبرى ترتاحي شكرا الك

طلعت لبرى وبقيو الشباب جوى ..
اعدت ع الكرسي وسندت راسي ، بعد شوي طلع لؤي من الغرفة و اجا لعندي اتطلع فيني و ابتسم ..
بعدين مسكلي ايدي وقلي : بحبك
معقول يا مجنونة تفكري اني اأذيكي اه يامريضة معقول تفكري هيك

ميرا : يلي شفتو خلاني شك بأمي مو بس فيك ، سامحني ياروحي

لؤي : يلله قومي لنروح ع البيت

ميرا : و احمد ؟

لؤي : احمد رح يطلع بس معتصم رح ينحبس

اتطمنا عن احمد انو طلع و نحنا رجعنا ع بيتنا فتح باب المزرعة وفتنا ، طلعت ع البيت يادوب شلحت تيابي وتدوشت ،بعدا رحت ع غرفتي و ارتميت ع تختي وماعد حسيت ع شي هييييك لوقت كانت الساعة 1 الضهر فتحت عيوني وكنت شبعانة نوم اول مرة من اسبوعين او تلاتة بنام فترة طويلة شي 8 ساعات يعني اتطلعت جنبي ، مالقيت لؤي ..
قمت من التخت وطلعت شوي شوي لبرى ..

انا وبالصالون سمعت صوت رنة التلفون نفسا ، رنة هداك الموبايل نفسا ، حطيت ايديي ع اداني وغمضت عيوني وصرت ابكي ..
بعدين لؤي فتح الباب وهو عم يضحك و بإيدو الموبايل قلي : يادبدوبة عم امزح معك تعي محضرلك مفاجآة
قربت لعندو وصرت اضربو ع كتفو و انا عم قلو : مابتفهم انت يادب مابتعرف انو صار معي خوف ومرض نفسي

اخدني من ايدي ونزلنا لناح المسبح ، كان في سفرة كبيرة عليها اكل وزينة وبولين .. ومن ورى ضهري سمعت بصوت واحد ( هابي بيرذداي تو يوو ) ..
فتلت ضهري ..
شفت اهلي .. المفاجأة كانت اهلي ..
ركدت لعندن وصرت ضمون و ابكي بعدين مسكت ايد لؤي وقلتلو : بحبك كتير
و دفشتو بالمسبح مشان تاني مرة مايرعبني ويعملي مفاجآت ع صوت رنة الموبايل

#وانتهت